A investigadora Laura Castro do CITENI, científica influente segundo a Universidade de Stanford

A Universidade de Stanford inclúe a 19 investigadores da Universidade da Coruña na lista do 2% dos científicos máis influentes do mundo, de acordo co «World’s Top 2% Scientist List». Nel atopamos á doutora Laura Castro Santos, enxeñeira industrial experta en renovables mariñas, docente na EPEF (Escola Politécnica de Enxeñaría de Ferrol) do Campus Industrial e investigadora adscrita ao CITENI (Centro de Investigación en Tecnoloxías Navais e Industriais) da UDC (Universidade da Coruña).

Esta clasificación, que se elabora anualmente con datos de Scopus proporcionados pola editorial Elsevier, da a coñecer ao 2% das persoas investigadoras con maior número de citas a nivel mundial. Existen dúas listaxes. A primeira ten en conta toda a traxectoria investigadora e a segunda as citas recibidas durante o ano 2022, para un total de 20 áreas de coñecemento e 174 subáreas de especialización.

A UDC posiciónase con 10 na primeira e 15 na segunda. A doutora Laura Castro destaca nesta última. En concreto, dentro das subáreas correspondentes con Enerxía e Enxeñaría Civil, que se inclúen dentro do campo de estudoTecnoloxías Estratéxicas (Enabling & Strategic Technologies).

O ranking «World’s Top 2% Scientist List» está considerado como un dos máis prestixiosas do mundo. Este ano publícase a sexta edición, tras avaliar información sobre a produción científica, citas e outros indicadores bibliométricos de máis de 200.000 investigadores en todo o mundo procedentes de universidades, hospitais, centros e institutos de investigación.