A RAGC distingue a Laura Castro polo seu labor investigador en enerxías renovables mariñas

A investigadora do Centro de Investigación en Tecnoloxías Navais e Industriais (CITENI) da Universidade da Coruña (UDC) Laura Castro foi distinguida co Premio RAGC-UIE para Investigadoras e Investigadores Xoves 2025 na categoría de Ciencias Técnicas. O galardón, concedido pola Real Academia Galega de Ciencias (RAGC), recoñece o talento investigador emerxente e busca impulsar as traxectorias de mozas e mozos científicos que desenvolven a súa carreira en centros de investigación galegos.

A UDC acadou unha destacada presenza nesta segunda edición do premios, ao contar con representación nas tres categorías convocadas. Xunto a Laura Castro, foron tamén recoñecidas Verónica Bolón, profesora da UDC e investigadora do Centro de Investigación en Tecnoloxías da Información e as Comunicacións (CITIC), galardoada na categoría de Ciencias Básicas polo seu labor pioneiro no desenvolvemento de sistemas de intelixencia artificial sostibles,; e María Barreiro, profesora da UDC e investigadora do centro de investigación Economics and Business Administration for Society (ECOBAS), premiada na categoría de Ciencias Sociais pola súa investigación orientada á sostibilidade das organizacións e á economía circular.

A concesión destes premios supón un importante recoñecemento á excelencia investigadora da UDC e ao impacto do coñecemento xerado nos seus centros e grupos de investigación. Dotados con 5000 € en cada categoría, os galardóns distinguen contribucións científicas relevantes nos eidos das ciencias básicas, as ciencias técnicas e as ciencias sociais. A entrega terá lugar o 18 de xuño en Santiago de Compostela, no Centro Obra Social ABANCA.

Recoñecemento á traxectoria de Laura Castro

No caso de Laura Castro, a RAGC salientou a súa traxectoria investigadora no ámbito das enerxías renovables mariñas, unha liña estratéxica que desenvolve desde o CITENI. O seu traballo céntrase no estudo técnico-económico da enerxía eólica mariña, a enerxía undimotriz, os sistemas híbridos de enerxía mariña e a enerxía solar mariña, así como no desenvolvemento de solucións para favorecer a integración destas tecnoloxías nos sistemas enerxéticos do futuro.

Na actualidade, Laura Castro é investigadora principal de tres proxectos de relevancia nacional e internacional relacionados co almacenamento de enerxía procedente de fontes renovables mariñas, a produción sostible de hidróxeno verde mediante enerxía eólica en mar aberto (offshore) e a mellora da eficiencia enerxética en distintos países europeos e da contorna do Cáucaso.

Ademais, é a única catedrática da área das construcións navais en Galicia e a máis nova de España nesta especialidade. A súa actividade científica compleméntase cunha ampla experiencia como avaliadora de proxectos de investigación para organismos nacionais e internacionais, entre eles a Unión Europea, o Ministerio de Ciencia e Innovación de España, a Autoridade de Enerxía Sostible de Irlanda e o Ministerio de Innovación, Ciencia e Tecnoloxía de Israel.

Este recoñecemento supón un novo aval á excelencia da investigación desenvolvida no CITENI e reforza o papel deste centro como referente na xeración de coñecemento e innovación nos ámbitos naval, industrial e enerxético. Ao mesmo tempo, a presenza de tres investigadoras da UDC entre as persoas premiadas nesta edición dos Premios RAGC-UIE pon de manifesto a fortaleza e o impacto da actividade investigadora da institución en áreas clave para o desenvolvemento científico e social.