Conclúe o congreso Polymer Processing Society 2024 que reuniu en Ferrol a máis de 250 persoas e posicionou ao CITENI da UDC á fronte da innovación en polímeros
Conclúe o congreso Polymer Processing Society 2024 que reuniu en Ferrol a máis de 250 persoas e posicionou ao CITENI da UDC á fronte da innovación en polímeros
O congreso internacional Polymer Processing Society (PPS) 2024 concluíu en Ferrol tras reunir a máis de 250 expertos de 29 países. Organizado pola UDC, a través do CITENI, o evento destacou polo seu enfoque na innovación e sostibilidade no procesamento de polímeros, coa participación de empresas líderes como Navantia e Airbus. Ferrol posicionouse así como un referente mundial neste campo
Con grande éxito e unha notable participación internacional, concluíu hoxe 3 de outubro o congreso da Polymer Processing Society (PPS) que se iniciou en Ferrol do 30 de setembro. Este prestixioso evento científico reuniu a preto de 250 investigadoras e investigadores de 29 países, e consolidou Ferrol como centro de referencia na investigación sobre o procesamento de polímeros. Durante catro días, máis de 200 presentacións científicas e conferencias destacadas ofreceron unha visión avanzada sobre os últimos desenvolvementos na industria dos polímeros, con especial énfase na sostibilidade, a economía circular e a innovación en materiais.
O congreso tivo diversos momentos clave, entre os que cabe salientarmos a cerimonia de recepción o 30 de setembro en Exponav, en que participaron destacadas autoridades como o alcalde de Ferrol, José Manuel Rey Varela; Martina Aneiros, delegada da Xunta de Galicia; Ignacio Frutos, almirante da Armada Española; e Sadhan Jana, presidente da PPS. Na inauguración institucional, que tivo lugar o 1 de outubro no Campus Industrial de Ferrol, Ricardo Cao, reitor da Universidade da Coruña, e Marcos Míguez, o director do campus, entre outras autoridades, puxeron de manifesto a relevancia deste congreso para o avance científico e a proxección internacional da cidade.
Momentos relevantes do congreso tamén foron as conferencias plenarias (plenary speakers) e as impartidas por líderes da industria (industrial keynotes), como Navantia e Airbus. Entre estas persoas, Mariano Campoy (ICMAB-CSIC) destacou os avances vinculados á electrónica orgánica para producir enerxía solar, mentres que Víctor Casal (Navantia) falou da relevancia das tecnoloxías de fabricación aditiva aplicadas ao ámbito naval, especialmente a impresión 3D de materiais poliméricos para substituír pezas metálicas; pola súa vez, Zulima Martin (Airbus) presentou avances sobre materiais compostos aplicados á industria aeroespacial. Así mesmo, subliñouse o éxito das conferencias impartidas por outro persoal científico de renome como Walter Focke, Suryasarathi Bose, Álvaro Goyanes e Celina Bernal, que abordaron temas sobre polímeros avanzados aplicados en diversas industrias, con especial énfase no ecodeseño e a reciclaxe.
Ana Ares, presidenta do comité organizador, puxo de relevo na súa intervención final as cifras do congreso: “Con máis de 250 asistentes de 29 países, o evento reafirma a importancia da colaboración internacional para afrontar os desafíos tecnolóxicos do sector”.
A clausura institucional, no Salón de Actos do Campus de Esteiro, contou coa participación da concelleira de Turismo do Concello de Ferrol, María del Carmen García Fraga, e o vicerreitor de Investigación e Transferencia da Universidade da Coruña, Jerónimo Puertas, que agradeceron o impacto positivo do evento na proxección internacional da cidade. A conferencia tamén serviu de plataforma para empresas que buscan integrar as novas tecnoloxías de procesamento de polímeros, ao tempo que promoven a innovación sostible e a competitividade industrial.
O congreso PPS24 concluíu cun optimismo compartido sobre o futuro do procesamento de polímeros e cun forte compromiso coa investigación de tecnoloxías que apoien unha transición cara a un modelo industrial máis sostible. As próximas edicións do congreso levaranse a cabo en Nova Zelandia en abril de 2025 e Canadá en setembro dese mesmo ano.
