Establecer as condicións tecnolóxicas e de capacitación (de I+D+i, humanas e empresariais) necesarias para facilitar a implantación xeral de modelos de xemelgo dixital de produto no sector auxiliar do naval na área de cooperación Galicia-Norte de Portugal. 

No ámbito naval, o xemelgo dixital adquire relevancia pola súa contribución á optimización do sostemento dun buque cando entra en operación. É unha oportunidade de negocio que permite ofrecer un mellor produto á clientela, ademais de que se espera que o mercado global de xemelgos dixitais pase dos 2100 M$ aos 183 000 M$ (2022-2030). Ábrense oportunidades no sector para adquirir unha maior madurez tecnolóxica, pero é necesario investir progresivamente en capacidade para xerar xemelgos dixitais de produtos como elemento central da súa transformación.