O CITENI e o CICA estreitan lazos para fortalecer a investigación conxunta en ciencia dos materiais

O Salón de Graos da Facultade de Humanidades do Campus de Ferrol acolleu este luns, 10 de marzo, unha reunión entre investigadores e investigadoras do Centro de Investigación en Tecnoloxías Navais e Industriais (CITENI) e do Centro Interdisciplinar de Química e Bioloxía (CICA). O obxectivo principal foi facilitar o coñecemento mutuo e explorar posibles puntos de encontro nas súas respectivas liñas de investigación.

Durante a apertura do acto, Armando Yáñez, director do CITENI, destacou o esforzo da organización e a resposta positiva da comunidade investigadora. Así mesmo, comentou que esta reunión vai permitirácoñecer en maior profundidade as actividades de cada centro e encontrar áreas en que se poida colaborar. En particular, subliñou a importancia de abordar as oportunidades de cooperación desde a perspectiva científico-técnica do CITENI, que se centra na investigación aplicada en tecnoloxías avanzadas e a súa transferencia cara ao ámbito industrial.  De igual maneira, na súa intervención, Yáñez lembrou unha cita de Francis Bacon: «O verdadeiro fin e a función da ciencia reside non en discursos plausibles, divertidos, memorables ou cheos de efecto ou en supostos argumentos evidentes, senón no obrar e traballar para o descubrimento de datos ata agora descoñecidos que dean unha bagaxe e sirvan de axuda para a vida». Tamén fixo fincapé na importancia da enxeñaría para transformar o coñecemento en solucións aplicadas que beneficien a sociedade.

Pola súa banda, Jaime Rodríguez González, director do CICA, agradeceu a iniciativa e subliñou o valor deste tipo de encontros para examinar de maneira exhaustiva as liñas de traballo de cada grupo e as infraestruturas dispoñibles en ambos os centros. Nas súas palabras, estas reunións permiten fortalecer a colaboración e aproveitar ao máximo os recursos existentes.

COMPARTINDO AVANCES EN CIENCIA DE MATERIAIS

Durante o evento, o persoal investigador dos dous centros presentou as súas respectivas liñas de investigación no campo da ciencia de materiais, destacando o traballo dos seus grupos nas áreas do desenvolvemento de novos compostos, as aplicacións avanzadas e as novas tecnoloxías para o estudo e procesamento de materiais.

Entre os grupos de investigación participantes estiveron os seguintes:

• Polímeros
• Química Biolóxica (QUIMBIO)
• Materials and Renewable Energy for Engineering, Environment and Sustainability (MARES)
• NanoQuímica BioInspirada (BioNanoChem)
• Solid State Chemistry & Materials (UdcSolids)
• Enxeñaría Supramolecular (SUPREN)
• Laboratorio de Aplicacións Industriais do Láser (LAIL)
• Investigación de Produtos Naturais Mariños (PRONAMAR)
• Bio-Based Products ( BBP)

O evento foi moderado por Jaime Martín, Oportunius Research Professor e membro do Grupo de Polímeros do CITENI, e Paco Fernández-Trillo, investigador do grupo BioNanoChem do CICA. Ambos foron impulsores desta iniciativa, cuxo propósito é fomentar o diálogo e a colaboración entre as unidades de investigación dos centros en que traballan.

PORTAS ABERTAS A FUTURAS COLABORACIÓNS

O encontro rematou cunha visita aos laboratorios do CITENI, o que permitiu coñecer as súas infraestruturas e os equipos de que dispoñen. A valoración xeral foi moi positiva e púxose de relevo a importancia destes encontros para fortalecer a cooperación e a transferencia de coñecemento. A previsión é que a próxima xuntanza teña lugar na Coruña, na sede do CICA, co obxectivo de consolidar este intercambio nun ciclo regular de xornadas de colaboración. Este foi un primeiro paso cara a futuras colaboracións que permitirán reforzar as sinerxías.