Persoal investigador da UDC propón unha metodoloxía innovadora para a mellora da eficiencia enerxética no transporte marítimo
Persoal investigador da UDC propón unha metodoloxía innovadora para a mellora da eficiencia enerxética no transporte marítimo
O novo procedemento permite monitorizar en tempo real o rendemento enerxético e as emisións dos buques. A investigación, publicada na revista Journal of Marine Science and Engineering, busca facer o sector máis sostible e adaptalo mellor ás normativas ambientais internacionais
Un equipo do Centro de Investigación en Tecnoloxías Navais e Industriais (CITENI) do Campus Industrial e da Escola Técnica Superior de Náutica e Máquinas (ETSNM) da Universidade da Coruña (UDC) publicou recentemente no Journal of Marine Science and Engineering o artigo titulado “Energy Efficiency Operational Indicator Resilient, Ship Emissions under Control”, que aborda o control da eficiencia enerxética no transporte marítimo.
O traballo, realizado en coautoría por Julio Barreiro e Vicente Díaz, do Grupo Integrado de Enxeñaría (GII), e por Feliciano Fraguela e Sonia Zaragoza, do Grupo de Enxeñaría Enerxética (INGEN), forma parte da tese de doutoramento de Julio Barreiro, dirixida por Sonia Zaragoza (INGEN) e Vicente Díaz (GII).
UNHA METODOLOXÍA QUE MELLORA A MEDICIÓN DA EFICIENCIA ENERXÉTICA DOS BUQUES
A investigación busca desenvolver un procedemento de cálculo multidisciplinar, automatizado e controlado en tempo real, do indicador operacional de eficiencia enerxética (Energy Efficiency Operational Indicator, EEOI, en inglés) que estableceu a Organización Marítima Internacional (IMO). Este indicador, que relaciona o combustible que se consome co traballo de transporte que se realiza, enfronta problemas de fiabilidade debido á variabilidade nos criterios que utilizan as compañías navieras, como a interpretación do valor da carga transportada ou as condicións operativas dos barcos.
Para superar estas limitacións, o equipo propón un método en dúas fases que selecciona valores representativos do EEOI na navegación do buque, en función de diversas condicións e características do transporte (como a velocidade do barco, a carga e o modo de operación) e implementa os cálculos nun sistema ciberfísico con sensores avanzados e software especializado, que recompilan e analizan o EEOI en tempo real.
CONTROL CONTINUO DO RENDEMENTO ENERXÉTICO MEDIANTE GRÁFICOS DE CONTROL
A investigación tamén destaca a importancia de empregar gráficos de control de media móbil ponderada exponencialmente (Exponential Weighted Moving Average, EWMA, en inglés), unha técnica estatística semellante a un “termómetro intelixente” que monitoriza continuamente a eficiencia enerxética e as emisións dos buques. Analiza os datos tanto actuais como históricos para detectar pequenas variacións ou tendencias. Se un buque comeza a contaminar máis do normal, o gráfico EWMA pono de manifesto, de xeito que é posible actuar sobre o problema antes de que se agrave.
O conxunto das dúas medidas permite implantar melloras continuas moito máis eficaces e garantir así o cumprimento dos obxectivos e as normativas ambientais. Con esta metodoloxía, o traballo achega unha solución innovadora para a mellora da eficiencia enerxética e ambiental no transporte marítimo, un sector chave que move máis do 85 % das mercadorías a nivel global e que afronta desafíos cada vez máis esixentes para satisfacer as directrices sobre o coidado do medio mariño da IMO.
Referencia: Barreiro Montes J, Fraguela Diaz F, Diaz-Casas V, Zaragoza S. Energy Efficiency Operational Indicator Resilient, Ship Emissions under Control. Journal of Marine Science and Engineering. 2024; 12(10):1753. https://doi.org/10.3390/jmse12101753
