A enxeñaría enerxética do CITENI súmase ao proxecto IGNICIA: ECOFROST_B do CICA, que propón unha alternativa sustentable á refrixeración con gases fluorados

Está demostrado que os hidrofluorocarbonos (HFC) e outros gases fluorados prexudican gravemente a saúde do noso planeta. Con todo, a maior parte dos sistemas de refrixeración tradicionais empregan esta tipoloxía de gases. O acordo para a revisión do Regulamento sobre gases fluorados da UE pretende a súa eliminación total para 2050. Esta nova realidade obriga a apostar pola innovación para o desenvolvemento de sistemas de refrixeración naturais e sustentables que favorezan a conservación do medio ambiente.

Na súa última convocatoria (2023), o Programa Ignicia Proba de Concepto da Axencia Galega de Innovación da Xunta de Galicia seleccionou nove proxectos de innovación entre os que se atopa ECOFROST_B, unha proposta do grupo UDCSOLIDOS do CICA, a única da UDC que acadou financiamento dentro desta convocatoria.

REFRIXERACIÓN NATURAL EFICIENTE

Este novo reto científico-tecnolóxico pretende demostrar a viabilidade industrial dun novo sistema de refrixeración natural con materiais barocalóricos (que alteran a súa temperatura segundo a presión soportada) baseado nos achados do Grupo de Investigación UDCSOLIDOS sobre as propiedades respiro-calóricas dun composto híbrido (metálico e orgánico): o MOF-508b. É capaz de arrefriarse até os -10 °C e quecer até os 56 °C con presións menores, de tan só 16 bar, en comparación con outros materiais barocalóricos que requiren até 1000 bar para conseguir cambios de temperatura.

Cun funcionamento semellante ao dos pulmóns, o material inflaríase ao recibir CO₂ e desincharíase ao expulsalo, o que levaría a xerar un cambio na súa estrutura que provocaría a variación térmica.

O Grupo de Investigación en Enxeñaría Enerxética do CITENI, liderado por Álvaro Baaliña, e a investigadora individual Sonia Zaragoza xa traballan no deseño dun prototipo que permita o funcionamento en continuo do sistema de refrixeración e favoreza a optimización dos procesos de transferencia de calor. Para iso, a configuración do contedor ten que facilitar o contacto do CO₂ co material barocalórico e os procesos de adsorción e desabsorción, alén da transferencia de calor cun fluído portador de calor.

OBXECTIVOS DE ECOFROST_B

O proxecto Ecofrost_B ten como obxectivo acelerar a futura comercialización dunha innovadora tecnoloxía de refrixeración baseada en materiais barocalóricos de estado sólido, que promete reducir as emisións de carbono e mellorar a eficiencia enerxética.

Entre os seus principais obxectivos cabe citarmos:

• o desenvolvemento dun prototipo de refrixeración para validar o funcionamento dos materiais barocalóricos,
• a elaboración de fichas técnicas coa información necesaria para os estándares de normalización e as empresas do sector,
• e a identificación da mellor ruta de comercialización.

Grazas ao Programa Ignicia Proba de Concepto, o proxecto disporá de 433 000 € de financiación durante dous anos, que permitirán o desenvolvemento tecnolóxico do prototipo, así como a posta en marcha dun plan de negocio e a posibilidade de acadar unha licenza de produto, baseada nesta tecnoloxía, para saír ao mercado.

UN EQUIPO DE TRABALLO INTERDISCIPLINAR

O equipo do proxecto está formado por investigadores da UDC que colaboran de xeito interdisciplinar desde dous centros de investigación da institución: o CICA e o CITENI. Eles son: Juan Manuel Bermúdez García (Investigador Principal do proxecto ECOFROST_B do Grupo UDCSOLIDOS-CICA), Manuel Sánchez Andújar (UDCSOLIDOS-CICA), María Antonia Señarís Rodríguez (UDCSOLIDOS-CICA), Socorro Castro García (UDCSOLIDOS-CICA), Álvaro Baaliña Insua (INGEN-CITENI-ETS de Náutica y Máquinas), Ignacio Arias Fernández (INGEN-CITENI-ETS de Náutica y Máquinas), Javier Romero Gómez (INGEN-CITENI-ETS de Náutica y Máquinas), Manuel Romero Gómez (INGEN-CITENI-ETS de Náutica y Máquinas) e María Sonia Zaragoza Fernández (CITENI).