O investigador do LIM Fran González asume a nova dirección técnica do CITENI

O Centro de Investigación en Tecnoloxías Navais e Industriais (CITENI) da Universidade da Coruña (UDC) comeza unha nova etapa. O investigador do Laboratorio de Enxeñaría Mecánica (LIM) Francisco Javier González Varela asume a dirección técnica do centro, cargo que ata o de agora desempeñara a investigadora do Grupo Integrado de Investigación (GII) Anne Gosset.

Tras máis de sete anos de dedicación e compromiso co proxecto de creación dun centro singular de investigación no Campus Industrial de Ferrol, a experta en mecánica de fluídos decidiu poñer fin a un período focalizado na xestión técnica para emprender novos retos profesionais, máis vinculados á súa traxectoria investigadora.

En 2017, Anne Gosset foi nomeada responsable da coordinación dos grupos de investigación que formaban parte do antigo Centro de Investigacións Tecnolóxicas. Desde aquela a evolución deste centro foi considerable, e nos últimos anos, xa como CITENI, experimentou grandes avances. En palabras da propia Anne: “Fomos testemuñas dun notable progreso e crecemento. Nesta última etapa, e grazas ao Convenio de I+D+i da Xunta de Galicia, establecemos a Oficina Técnica do CITENI e consolidamos un equipo de traballo cohesionado que contribuíu enormemente á creación e o recoñecemento do centro, e tamén á participación activa dos grupos e investigadores adscritos. Ademais, a nova estratexia científica propiciou o desenvolvemento de novas investigacións transdisciplinares. Tamén se fortaleceron as alianzas con centros de investigación internacionais e se ampliou significativamente o número de membros adscritos. Co horizonte claro, agora queda continuar o camiño cara á acreditación do centro, que comporta unha importante achega de financiamento para asegurar o progreso das investigacións que se están levando a cabo e favorecer a consolidación dos novos grupos de investigación, aqueles establecidos máis recentemente no centro. Estou segura de que, nesta próxima fase que comeza agora, a dirección científica liderada por Armando Yáñez e a nova dirección técnica encabezada por Fran González unirán forzas para impulsar a misión do centro e alcanzar os nosos obxectivos pendentes”.

O investigador do LAIL Armando Yáñez Casal, director científico do CITENI desde 2021, eloxiou a contribución de Anne Gosset á creación do centro: “Durante os últimos sete anos, Anne Gosset foi un piar fundamental no CITENI. A súa dedicación incansable e o seu forte compromiso foron unha gran forza impulsora que favoreceu a súa evolución, crecemento e consolidación. Agora, tras unha meditada decisión, Anne finaliza unha etapa focalizada na xestión para emprender novos retos profesionais máis vinculados á súa traxectoria investigadora, o cal marca o comezo dun novo período, tanto para ela como para o centro de investigación. O seu liderado inspirador e a súa contribución ao progreso do centro deixarán, sen dúbida, unha pegada indeleble. Ademais, a incorporación de Fran González, quen relevará a Anne no cargo da dirección técnica, supón a continuidade do proxecto do centro e un impulso importante ata alcanzar o obxectivo da acreditación, que nos permitirá abrir a porta a novas iniciativas e novos proxectos, vinculados especialmente coa innovación e a investigación tecnolóxica aplicada”.

O investigador do LIM Francisco Javier González Varela toma agora a remuda e, desde o 1 de marzo, xa é o novo director técnico do CITENI. Declara: “Asumo con optimismo este novo desafío profesional. Agradezo á dirección o camiño labrado e a confianza que depositaron en min para desempeñar este cargo. A miña misión agora é continuar co impulso da estratexia científica do centro, potenciar o desenvolvemento das liñas de investigación que se botou a andar e fomentar a colaboración entre grupos. Traballaremos arduamente para alcanzar o obxectivo da acreditación, un fito crucial que recoñecerá a calidade e a excelencia da nosa actividade investigadora, amais de permitirnos acceder a recursos adicionais para impulsar aínda máis o noso labor científico e tecnolóxico. Estou seguro de que xuntos construiremos un futuro prometedor para o CITENI e continuaremos avanzando no noso compromiso de contribuír ao progreso científico e tecnolóxico da sociedade”. A súa excelencia investigadora e a súa demostrada capacidade para a xestión e o liderado prometen ser fundamentais para atinxir os obxectivos marcados para este novo período.

FRAN GONZÁLEZ E A SÚA TRAXECTORIA INVESTIGADORA

Francisco Javier González Varela é profesor titular da UDC desde 2023. Doutor en Enxeñaría Mecánica, realiza as súas investigacións dentro do Laboratorio de Enxeñaría Mecánica (LIM) do CITENI. É experto en dinámica de sistemas multicorpo (MBS) e cosimulación. A súa traxectoria investigadora levouno a colaborar internacionalmente con universidades e centros á cabeza da investigación na súa especialidade, como a LUT University (Finlandia), o Rensselaer Polytechnic Institute (Estados Unidos) e a McGill University (Canadá). Tras o seu regreso a España, foi investigador Juan de la Cierva e posteriormente Ramón y Cajal na UDC.

Actualmente, pescuda algoritmos para a simulación e a análise de sistemas multifísicos, a cosimulación en tempo real e as probas de compoñentes de hardware en bancos ciberfísicos, tecnoloxías con gran relevancia industrial, especialmente en áreas como a industria automotriz. Dirixiu varias teses de doutoramento e traballos de fin de mestrado e grao vinculados a este ámbito do coñecemento. Ten no seu haber máis de 35 publicacións en revistas científicas e 75 contribucións a congresos internacionais. Participou tamén en 21 proxectos de investigación nos ámbitos autonómico, nacional (en España e Canadá) e europeo.

Ademais da súa excelencia investigadora, nos últimos anos levou a cabo numerosas tarefas de xestión e liderado. Desde comezos de 2024 é chair do Comité Técnico de Dinámica Multicorpo da International Federation for the Theory of Machines and Mechanisms (IFToMM). É tamén secretario do Comité Técnico de Dinámica Multicorpo e Non-lineal da Sociedade Estadounidense de Enxeñeiros Mecánicos (ASME). É editor asociado da revista Mechanics Based Design of Structures and Machines e revisor para 40 revistas científicas e conferencias internacionais. Tamén organizou e presidiu conferencias internacionais, como The International Symposium on Co-Simulation and Solver Coupling in Dynamics (COSIM 2021) e as edicións de 2019 e 2020 do congreso Multibody System and Nonlinear Dynamics and Control (MSNDC) da ASME.

Así mesmo, é destacable o seu compromiso coa difusión e a transferencia de coñecemento. Colaborou coa iniciativa MDA Space Missions, Siemens, Tecnalia e GKN Driveline para a aplicación de técnicas de simulación e xemelgos dixitais na industria, especialmente a automotriz. No marco destas colaboracións impartiu actividades de formación nas empresas colaboradoras e desenvolveu software de simulación para elas.